Þetta verður að gerast, óumflýjanleg staðreynd bloggheima. Það kemur ávallt að svona ögurstundum, erfiðum ákvörðunum. Jafnvel þó að innst inni hefði ég viljað hætta að blogga eftir bestu færslu í heimi, þá getur smáborgarabloggarinn í mér bara ekki orða bundist og ég verð, neyðist, finn þessa óútskýranlegu þörf til að blogga um eitthvað vitagagnslaust, tilbreytingarsnautt og ömurlegt. Allt sem verður skrifað hérmeð mun fölna miðað við þá færslu sem, því miður, og það hryggir mitt hjarta, mun hverfa af forsíðunni. Ég finn tár á hvarmi, ekkasog í aðsiglingu, seratón-flæðið minnkar, sorg myndast og söknuður við sjóndeildarhringinn.

Ég er vitaskuld að tala um hina goðsagnakenndu RAMBO-færslu. En, ég mun ávallt minnast þín, mín elskulega RAMBO-færsla, það var heiður að skrifa þig.

RAMBO-færslan lengi lifi!

Heill sé þér!

Halelúja!

Rétt í þessu var góðvinur minn Óskar að minna mig á snilldarþættina JAM eftir Chris Morris og fleiri.

Vitaskuld var farið beint á IMDb til að fletta upp góðu kvóti, og hvað finnur maður? Nú, gott kvót, hvað annað?

"Stupid people are great at winning arguments because they're too stupid to realize they've lost."

(Treggáfað fólk er frábært í að vinna rökræður, því þau eru svo treg að þau gera sér ekki grein fyrir því að hafa tapað)

Til stendur að setja upp söngleikinn Rocky Horror hér á Höfn. Gæti verið áhugavert. Ætli maður reyni ekki að plata eitthvað valinkunnið borgarrottupakk til að kíkja á þetta og fara svo á alvöru fyllerí þar sem ókunnugir gætu verið barnir fyrir að vera ókunnugir, þarf betri ástæðu? This is a local shop for local people, there´s nothing for you here!

En þetta er næstum sama leikaraliðið sem staðið hefur að leiksýningum undanfarin ár, þó gæti farið svo að gamlar kempur vilja dusta rykið af leikhæfileikum sínum og vera með. Kemur í ljós.

Jæja. Ætli það fari ekki að líða að því að ég flytji mig aftur um bloggsvæði, nema þessir þroskaheftu "stjórnendur" fari að svara og sinna einhverju af því sem ég hef reynt að tjá þetta dónalega hyski um.

Ísland og þjónustulund? Ekki góð blanda.

Það varð breimandi læða á mínum förnum vegi um daginn. Óhljóðin úr kvikindinu hræddu mig mjög. Hélt ég mundi aldrei sofna. Vona að þetta dýr muni aldrei birtast fyrir mínum vitum aftur.

Hin eiturhressa fyrrum starfsfélagatjeppan Laufey Lind spurði mig nokkrar spurningar í lok lotningu sinni yfir hinni margumrómuðu og frábæru RAMBO-færslu minni. Ég ætla hér að gera tilraun til að kunngera þessa spurningaliði og það er aldrei að vita að eitthvað annað læðist þar inn sem gæti kætt og bætt líf og lund lesendur.

"Hvernig er geðheilsan annars?"

Geðheilsan er almennt séð þokkaleg, vissulega eru sumir dagar verri en aðrir, en það er nú bara einsog það er. Ég hef ekki verið var við gífurlegar ranghumyndir, ofsjónir eða paranoju og þess háttar er ég er allsgáður. Annað er nú hægt að segja þegar maður hippast stöku sinnum, þó aðallega á haustin, þá er nú ágætt að svamla í sjó geðsýkinnar til þess að vakna daginn eftir vitandi það hvað maður er nú frekar andlega heilbrigður.

"[O]g hvernig líður þér svo í líkamanum?"

Skrokkurinn þjónar sínum tilgangi. Kominn með netta, smávaxna og spengilega bjórístru sem ég sæmilega stoltur af. Þó verður maður stöku sinnum var við reykingarhóstann og aukinheldur verður maður móður og más eftir einhverja meiri hreyfingu en að arka um götur, stíga og garða. Hef haft það á stefnuskrá ansi töluvert lengi mjög að fara stunda ræktina, en fæ mig ekki í það sökum þess að það mundi brjóta í bága við mitt sæmilega óheilbrigða, tóbaksmökkandi og bjórsötrandi líf, en þetta er á döfinni.

"Ertu í leiklistinni eitthvað?"

Þegar tækifæri gefst þá er ég oftast tilbúinn að skella mér eitthvað hlutverk. Hef leikið konuberjandi fýr, gólandi Rómverja, vitfirrtan trúðakennara og er nú hugsanlega að lifa mig inní syngjandi hjálparhellu utanað geimi, aukinheldur tek ég að mér að vera sönglandi bavíani stöku sinnum.

"Skóla?"

Tók ansi mörg fög einu sinni og var kominn dágóða leið í átt að stúdent áður en letin tók við völd, hef ekki stundað skóla, nema skóla lífsins, í næstum tvö ár. En maður er alltaf á leiðinni í námið á ný.

"Dökkt - eða mjólkur súkkulaði?"

Ég er meira fyrir mjólkursúkkulaði þar sem dökkt súkkulaði fær mig til að hnerra.

Ef það eru fleiri spurningar, þá skal ég glaður svara þeim nema einhverjir vilja tala við mig á MSN, en ég er afar stöpull notandi, þá er emmessennið mitt jarnfruin@hotmail.com